السلام عليكم ورحمة الله وبركاته

 شلونكم وشخباركم يالغاليين ، وشلونكم مع الاغبار الثلجي اللي حاش الكويت قبل جم يوم كان الجو الصراحه روعه مناظر خلابه بس انا تضايقت وايد من شغله وحده اني قبلها بيوم وديت سيارتي المغسله ودافع 20 دينار واليوم اللي وراه صارت السياره ألعن من قبل - انا أطالب الحكومه (( خل يطالب حاله من حال غيره )) انها تعوض كل اللي غسلوه سياييرهم قبل الغبار وترجع لهم الـ 20 دينار ولاترى بسوي اضراب وشغل مغاسل البيت كلهم وخلص الماي عليكم

 وعلى طاري الماي انا استغرب من كلمة الشيخ احمد الفهد لما قال ان الماي انقطع عن قصر دسمان !! عاد شسووا سكان قصر دسمان راحوا يدورونلهم تناكر حالهم حالنا ولا راحوا زياره حق دار سلوى علبين مايرد لهم الماي ؟ ودي اصدق بس قويه قويه ههههه انا اقول ماكو غير حل واحد لمشكلة الماي انهم يسلمون هالوزاره حقنا احنا الكنادره عندنا الخبره وكل شي وهذي وزارتنا من ايام الكوت وماسمعنا ان على ايامنا انقطع الماي عن احد

 

الحرب على لبنان

 أول ايام الحرب الاسرائيليه على لبنان كنت قاعد مع واحد من الشباب ولأن كل القنوات كانت تنقل اخبار لبنان قالي صاحبي تدري منو اللي مستانسين من هالحرب وقاعدين يتشمتون باللبنانيين قلتله منو قالي السوريين ... لانهم طلعوا جيشهم من لبنان . قلتله ياخوي ماكو مسلم يستانس من مصايب مسلمين نفسه ، الحزن موجود عند كل مسلم كل العالم الاسلامي رافض الاعتداء الصهيوني على لبنان اذا مو بيدهم فبلسانهم وقلبهم

 لفت انتباهي خبر مكتوب بالجريده يقول اسرائيل : العمليه البريه الموسعه وارده ودمرنا 50% من حزب الله الظاهر الاخ اللي قايل هالخبر وايد متأثر بشخصية الصحاف يقول دمرنا 50% من حزب الله وصواريخ الكاتيوشا اللي تقصف حيفا هالايام اكثر من قبل ... هم ودي اصدق بس قويه

 اللهم ثبت اقدامهم وانصرهم على اعداءك واعداء الدين

ولاء الشيعه لايران

 قبل غزو صدام حسين للكويت بفتره طويله كان في محاوله للرئيس العراقي اللي قبله لغزو الكويت وجمع جيوشه على الحدود الكويتيه العراقيه بس وقف بويهه الشاه الايراني وارسل خمس بوارج ايرانيه محت الجيش العراقي من على حدود الكويت

 بالمقابل بالحرب الايرانيه العراقيه كانت الكويت تقدم ملايين الدنانير حق العراق بعد ما سمعونا اغنية وين الملايين الشعب العربي وين عطيناهم اللي ورانا ودونا لين قعدنا يوم 2-8 وشفنا الملايين تذبح وتدمر الكويت

قال الرئيس حسني مبارك ان ولاء شيعة الخليج حق ايران وانا ارد بجمله وحده ان اكثر من 70% من الاسرى والشهداء بحرب الكويت من الشيعه . وعيب عليك ياريس تشعل الفتنه في دول الخليج

     

 

 

سؤال محرج وجواب عظيم

 مره من المرات كنت قاعد بيت عمتي اللي ريلها من فئة البدون وموظف بالجيش الكويتي . وكان معانا ولدها اللي عمره 6 سنين وبنتها اللي عمرها 10 سنين ودار الحديث بيني وبين عمتي عن عماتي ويدي ويدتي اللي مسافرين اسبانيا ومتى يردون ومتى اخر مره كلمتهم ومن هالحجي مره وحده نقز ولدها وسأل هالسؤال : يمه احنا ليش كل مره مانسافر معاهم وبس اهما يسافرون .... هني طبعا انربطت السنتنا وانصدمنا من هالسؤال ومو عارفين شنو نرد عليه نقوله انت بدون انت غير معترف فيك بالدوله انت تعتبر نكره على المجتمع ومالك اي حقوق ... لا تقدر تسافر ولا تعالج ولا حتى تتزوج حتى الضحكه اذا تبي تضحك لازم اتطلعلك ورقه من اللجنه . كلام كبير وصعب على اللي بعمرك يفهمه واحنا بصدمتنا وارتباكنا سمعنا صوت بنتها وهي تقول : احنا ابونا يحمي الكويت علشان جذي مايقدر يخليها ... صج جواب عظيم من قلب صغير

وتعلمي يا حكومه

 

خلصنا من كلام السياسه وننتقل الى عالم الفن وهالاخبار اللي شفتها بالجريده

 تحت عنوان انتفاخ بقسم فنون بجريدة الوطن هذا الخبر

 اعلنت احدى الممثلات عن ندمها بسبب ما اجرته من عمليات تجميل وقالت انها تشعر بالاسى لان وجهها انتفخ وشفاهها تضخمت وادركت بالنهايه ان الجمال ليس بالشكل ولكن بالروح والشخصيه وحب الخير للاخرين.

 وانا اقول انتي من اول ما تنبلعين انتي وحنجج العوي ورمضان اللي طاف طالعتلي بحنج عوي وشفايف جنهم مطبات الشاميه اليدد وتقولي الجمال بالاخلاق والشخصيه ومحاضر السكر والسهرات لج مسطره بالمخافر

 ويقولون والذمه على الراوي انج ام خمسين دينار هههههههههههه انا اقول الفن وين وانتي وين يا ام خمسين

 بنفس الصفحه تحت عنوان استفزاز يقول الخبر

 هيفاء وهبي انتقدت في حديثها مع الراي موجة العري في اغاني الفيديو كليب وقالت ان هذه المشاهد تستفزها وتثير غضبها

 انا اقول عدل كلامج يا هيفا والدليل انج تعتبرين مدرسه من مدارس العري والاثاره وتعتبرين الاولى بينهم

كان ودي اقولج كلام الشاعر : لاتنهى عن خلق وتأتي مثله عار عليك اذا فعلت عظيم

بس للاسف انتي كلج على بعضج 

 عار يا هيفا